Dekabrın 7-də Qızılağac Milli Parkında ikinci "Flaminqo Festivalı" keçiriləcək. Bu barədə Xəbər24.mediaya Lənkəran Regional Turizm İdarəsinin rəisi İlqar Əzimov məlumat verib. Onun sözlərinə görə, saat 11.00-dan başlayan tədbir axşam saat 18.00-a kimi davam edəcək.
Festivalın iş proqramından söz açan İ.Əzimov bildirib ki, iştirakçılar Qızılağac Milli Parkı ərazisində qayıq və kvadrosikllarla gəzmək, körfəz ərazisində quş sürülərini müşahidə etmək, körpə balıqların körfəzə buraxılması prosesini izləmək, respublikamızda fəaliyyət göstərən bütün Milli Parkların pavilyonları ilə tanış olmaq, vəhşi təbiətdə sağ qalmaq yollarını öyrənmək və peşəkar sənət ustalarının ifasında rəngarəng konsert proqramına tamaşa etmək imkanı əldə edəcəklər.