Teleqramın təsisçisi Pavel Durov Fransada ona qarşı açılmış iş çərçivəsində ilk dəfə Paris məhkəməsində ifadə verib.
Fakt.info "Qafqazinfo”ya istinadən xəbər verir ki, bu barədə AFP məlumat yayıb.
Agentlik qeyd edib ki, cümə günü Durov platformanın cinayət fəaliyyəti ilə mümkün əlaqəsinin araşdırılması ilə bağlı hakim tərəfindən dindirilib. O, iki vəkilin müşayiəti ilə yerli vaxtla saat 10:00-da Paris məhkəməsinə gəlib.
Durov, Fransa ədalətinə güvəndiyini söyləyib və ona qarşı irəli sürülən ittihamlarla bağlı əlavə şərh verməyib.
Xatırladaq ki, Pavel Durov avqustun 24-də Fransanın "Le Burje” hava limanında şəxsi təyyarədən enərkən saxlanılıb. Ona qarşı qanunsuz əməliyyatlar aparmaq məqsədilə onlayn platformanın idarə olunması da daxil olmaqla 6 maddə üzrə ittiham irəli sürülüb.
Durov 5 milyon avro girov müqabilində məhkəmə nəzarətinə götürülüb və onun Fransadan çıxışı da qadağan edilib.