Bir neçə gün bundan əvvəl Prezidentimiz cənab İlham Əliyev Birinci xanım Mehriban Əliyeva ilə Qarabağa növbəti səfər etdi və yenidən qurulan Ağdamın Sarıcalı kəndinin sakinləri ilə görüşdü, onlara yeni tikilmiş evlərin açarlarını təqdim etdi. Bu hadisə növbəti dəfə Azərbaycanın siyasi və iqtisadi cəhətdən güclü bir dövlət olduğunu bütün dünyaya nümayiş etdirdi. Öz evlərinə dönən soydaşlarımızın üzlərində dünyanın ən xoşbəxt insanları olduqları hiss edilirdi. Artıq minlərlə keçmiş məcburi köçkünlər bu xoşbəxt günləri, anları yaşayıblar. Dövlətimiz dünyada misli görünməmiş bir yeniliyə imza atdı. Erməni faşistləri tərəfindən tamamilə dağıdılmış şəhər və kəndlərimiz qısa zaman ərzində yenidən quruldu. Yaşayış evləri ilə bərabər böyük infrastruktur layihələr yaradılır, yeni müəssisələr qurulur, aqrar və kənd təsərrüfatının inkişafı üçün böyük işlər görülür. Artıq Qarabağda istehsal edilən məhsullar xarici dövlətlərə ixrac olunmaqdadır. Evlərinə dönən hər bir vətəndaşımızın xoşbəxt həyat sürmələri üçün dövlətimiz tərəfindən bütün işlər görülüb və bu istiqamətdə işlər davam etdirilir. Yenidənqurma işlərinə Azərbaycan dövləti milyardlarla manat vəsait ayırıb. Bütün bu işləri dövlətimiz öz gücü və öz hesabına həyata keçirib.
Dünyanın gözü qarşısında baş verən bu işlərə daxildəki radikallar, xaricdəki vətən xainləri hər vəcdlə qara yaxmağa, dövlətimizə, xalqımıza qarşı böhtan atmaqdan hələ də çəkinmirlər. AXCP sədri Əli Kərimli, eləcə də Amerikadan Azərbaycana qarşı böhtan kampaniyasına başçılıq edən Osmanqızı hər gün internet kanallarında, sosial şəbəkələrdə dövlətimizə, xalqımıza qarşı sözün əsl mənasında düşmənçilik fikirləri səsləndirirlər. Əli Kərimli insanları, xüsusən universitet tələbələrini dövlətə, xalqa qarşı çıxış etməyə səsləyir. Onun məqsədi ölkəmizdə qarşıdurma yaratmaqdır, çünki radikallar Avropadakı Azərbaycana düşmən kəsilən dövlətlərin, qurumların əmrlərini yerinə yetirirlər. Bu "siyasətçi" başa düşmür ki, Azərbaycan xalqı onları çoxdan nəinki siyasətçi, hətta normal insan kimi belə qəbul etmirlər. Radikallar və xaricdəki "mühacirlər" Avropa İttifaqı və Avropa Parlamentinə məktublar ünvanlayırlar ki, guya Azərbaycanda 300-dən çox siyasi məhbus var. Əslində adlandırdıqları "siyasi məhbuslar" ölkə qanunlarına qarşı çıxaraq cinayət əməlləri törədənlərdir. Cinayət törədən bu şəxslər də radikal liderlərin tapşırıqlarını yerinə yetirirlərki, sonra onları dünya ictimaiyyətinə siyasi məhbus kimi təqdim etsinlər. Avropa Parlamenti və Azərbaycana düşmənçilik mövqeyi sərgiləyən bəzi beynəlxalq təşkilatların ölkəmizə qarşı qəbul etdiyi qərəzli qərar və qətnamələrin məzmunu ilə tanış olduqda onların ölkə daxilindəki radikalların və xaricdəki xainlərin söylədikləri fikirlərlə eyni olduğunun şahidi oluruq. Aydındır ki, bütün bunlar bir mərkəzdən idarə olunur. Hələ 90-cı illərin əvvəllərində Əli Kərimli hakimiyyətə gəlmələri üçün 9 ölkənin razılığının alındığını söyləmişdir. 30 ildən çox vaxt keçməsinə baxmayaraq bu bədnam "siyasətçi"yenə də başqa dövlətlərin boyunduruğundan əl çəkmir. Səriştəsiz, kiçik bir partiyanı idarə edə bilməyən bir şəxsin müstəqil bir dövlət idarə edə bilməsi gülüncdür. Radikal müxalifət yaxşı anlayır ki, Prezident cənab İlham Əliyev Azərbaycanı dünyada söz, nüfuz sahibi olan tam müstəqil, güclü bir dövlətə çevirib. Ancaq bu bədxahlar Avropadakı ağalarının tapşırıqlarını yerinə yetirir və Azərbaycanın bu uğurlarını heç cür həzm edə bilmirlər. Bu gün Azərbaycan müasir dünyada kolonializm, müstəmləkəçilik siyasəti aparan böyük dövlətlərlə mübarizə aparır və hər zaman müstəmləkəçilikdən əziyyət çəkən dövlətlərə, xalqlara dəstək nümayiş etdirir.
Azərbaycana qarşı məkirli, eləcə də xain siyasəti yürüdənlər sadə bir həqiqəti anlamalıdırlar ki, bütün xalq öz lideri ətrafında bir yumruq kimi birləşibsə heç bir qüvvə bu birliyə qalib gələ bilməz. Azərbaycanda da bu gün sarsılmaz birlik və həmrəylik mövcuddur. Azərbaycan xalqı öz liderinin, lider isə öz xalqının arxasındadır.
Kamilə Əliyeva
BDU-nun kafedra müdiri, professor