Lənkəranda "Region gənclərinin və idmançılarının həmrəylik forumu" adlı tədbir keçirilib.

Tədbirdə Lənkəran ŞİH başçısının müavini Emin Quliyev, Azərbaycan Respublikasının Gənclər və İdman Nazirliyinin Gənclərlə iş şöbəsinin müdiri Ramil Cabbarov, Lənkəran-Astara Regional Gənclər və İdman İdarəsinin rəisi Teymur Babazadə çıxış edərək ölkəmizdə gənclər və idman sahəsində qazanılmış uğurlardan danışıb, Azərbaycanın dünya arenalarında qazandığı parlaq idman qələbələrindən söz açaraq ölkə Prezidenti İlham Əliyevin gənclərin daim yanında olduğunu vurğulayıblar. Natiqlər eyni zamanda 2024-cü ilin Lənkəran üçün böyük əhəmiyyətə malik olduğunu bildiriblər. Belə ki, bu il Lənkəran Türk Dünyası Dövlətlərinin Paytaxtı, eyni zamanda ölkənin Gənclər Paytaxtı adını qazandığına görə bir sıra layihələrə ev sahibliyi edib. Keçirilən bu layihələrdə və tədbirlərdə ölkənin müxtəlif regionlarından gənclər, idmançılar, dövlət qurumlarının əməkdaşları iştirak ediblər.

Dövlət qurumlarının rəhbərlərinin, İctimai Birliklərin, Dövlət Təşkilatlarının nümayəndələrinin, idman ictimaiyyətinin, şəhid ailələrinin üzvlərinin, Vətən müharibəsi iştirakçılarının iştirak etdiyi tədbirdə Lənkəran-Astara Regional Gənclər və İdman İdarəsinin il ərzində əməkdaşlıq etdiyi dövlət qurumlarının nümayəndələri, beynəlxalq, dünya, avropa və ölkə çempionatının qalibləri, eləcə də gənclər mükafatlandırılıblar.

Bununla yanaşı 2024-cü il Lənkəran Gənclər Paytaxtı ili çərçivəsində keçirilən ölkə miqyaslı tədbirlərdə iştirak etmiş gənclər il boyu səmərəli fəaliyyətinə görə Lənkəran-Astara Regional Gənclər və İdman İdarəsinin Fəxri Fərmanına, təşəkkürnamə və hədiyyələrə layiq görülüblər.

Forum gənclərin ifasında konsert proqramı ilə yekunlaşıb.